ABŞ-ın Kanadadan idxal olunan mallara tətbiq etdiyi tariflər ölkənin müxtəlif sənaye müəssisələrində işçilərin ixtisarına gətirib çıxarıb. İstehsal şirkətləri, istehsal etdikləri mallara tələbatın azalması və ticarət dövriyyəsinin aşağı düşməsini səbəb kimi qeyd edirlər.
Hansı biznes sektorlarında ixtisarlar var?
Kanadanın aparıcı polad istehsalçılarından biri Canada Metal Processing Group fevralın 24-də Ontario və Kvebekdəki istehsal və ofis heyətindən 140 nəfərin ixtisara düşəcəyini açıqlayıb. Şirkət, “ABŞ-ın tarif təhdidləri və istehsal etdikləri məhsullara gözlənilən tələbatın azalması” kimi əsas amilləri ixtisarlara səbəb kimi göstərib.
Eyni şəkildə, Montreal mərkəzli corab istehsalçısı olan Sheertex işçilərinin 40 faizini (təxminən 140 nəfər) müvəqqəti işdən çıxarıb. Şirkət, son ABŞ tarif dəyişiklərinin yaratdığı maliyyə qeyri-müəyyənliyini bu qərarın əsas səbəbi kimi qeyd edib.
Daha bir ciddi zərbə South Shore Furniture şirkətindən gəlib. Kvebekdə yerləşən mebel istehsalçısı 115 işçisini ixtisar edərək yeni sistemə adaptasiya proqramına başlayıb. Şirkət, böyük Amerika pərakəndə satıcılarının Kanada məhsulları əvəzinə Asiya bazarlarına üstünlük verməsi səbəbindən satışlarının əhəmiyyətli dərəcədə azaldığını bildirib.
4-6 aya ixtisarlar arta bilər
KPMG şirkətinin keçirdiyi son sorğu göstərir ki, kanadalı işəgötürənlərin 50 faizi tariflərin yaratdığı qeyri-müəyyənlik səbəbilə istehsalın azaldılmasını və ya işdən çıxarılmaları nəzərdən keçirir. Bundan əlavə, “ticarət savaşı” bu cür davam edərsə, 28 faiz şirkət növbəti 4-6 ay ərzində işçi ixtisarına başlamağı planlaşdırır.
Müəssisələrdəki ixtisarlar Kanada və ABŞ arasındakı ticarət gərginliyinin daha ağır iqtisadi nəticələrinin olacağından xəbər verir. Xüsusilə bu ağır nəticə istehsal sənayesi üçün gözlənilir. Şirkətlər dəyişən bazar şərtlərinə uyğunlaşmağa çalışarkən, sənaye liderləri və siyasətçilər daha çox iş itkisini azaltmaq üçün təcili ticarət danışıqları aparmağa çağırırlar.
Foto: Monkhouselaw
