Kanada Seçki Komissiyası, aprelin 28-də keçiriləcək federal seçkilər ərəfəsində ölkə üzrə 200,000-dən çox müvəqqəti işçi götürür və hər vəzifə üçün saatına minimum 20 dollar maaş təyin olunub.
Mövcud vakansiyalara qeydiyyat məmurları, informasiya məmurları, məntəqə nəzarətçiləri və digər vəzifələr daxildir. Bu vəzifələrin öhdəliklərinə seçki məntəqələrinin qurulması, seçicilərin qarşılanması, şəxsiyyət vəsiqələrinin yoxlanılması, bülletenlərin idarə olunması və seçicilərin düzgün masalara yönləndirilməsi daxildir.
Kanada Seçki Komissiyasının seçki məntəqələrində işləmək üçün namizəd ən azı 16 yaşlı Kanada vətəndaşı olmalıdır. Bütün işlər üçün ödənişli təlim keçirilir.
Saatına 20-26 dollar əməkhaqqı
Seçki komissiyasına görə, seçki məntəqələrində çalışan işçilər məntəqələrin problemsiz fəaliyyətində əsas rol oynayırlar. Bu vəzifədə çalışanların uzun saat ayaq üstə qala bilməsi və 13 saata qədər növbələrdə işləməyə uyğun olması tələb olunur. Seçki məntəqəsi işçilərinə saatına 20 dollar, nəzarətçi vəzifələri üçün isə saatına 26.46 dollardan başlayan əməkhaqqı təklif edilir.
Müraciət üçün link
Bundan əlavə, ölkə üzrə müxtəlif ali təhsil müəssisələrində yaradılmış “Kampusda səs ver” məntəqələrində də informasiya məmurları və xidmət agentləri işə götürülür. Bu vəzifələrin maaşı saatda 20- 23 dollar arasında dəyişir.
Seçki Komissiyası, həmçinin ofisdə çalışacaq inzibati heyət də axtarır.
Ətraflı məlumat almaq və müraciət etmək üçün elections.ca/jobs saytına daxil olun.
Foto: Elections Canada
