Ontario hökuməti ABŞ-ın tətbiq etdiyi tariflərin təsiri və iqtisadi qeyri-müəyyənlik şəraitində əyalətin iqtisadiyyatını qorumaq məqsədilə işçilərə və bizneslərə təxminən 11 milyard dollar dəyərində yardım ayırıb. Ontarionun baş naziri Doug Fordun ofisindən verilən məlumata görə, Amerika prezidenti Trampın Ontario iqtisadiyyatına qarşı hücumları fonunda, hökumət işçiləri və biznesləri qorumaq üçün nə lazımdırsa, edəcək: “Bu gün elan etdiyimiz tədbirlər işçilərə və biznes sahiblərinə bu qeyri-müəyyən dövrdə lazım olan dəstəyi təmin edəcək. Biz prezident Trampa nəzarət edə bilmərik, amma özümüz üçün necə bir gələcək quracağımıza tam nəzarət edirik. Ontarionu qorumağın ən yaxşı yolu, daxili ticarət maneələrini aradan qaldıraraq və ticarətimizi şaxələndirərək, G7 ölkələri arasında ən rəqabətli iqtisadiyyatı qurmaqdır ki, bu da bizi daha dayanıqlı, firavan və təhlükəsiz əyalətə  çevirəcək”.

İşçiləri və biznesləri dəstəkləmək üçün Ontario hökuməti aşağıdakı addımları atır:

• 2025-ci ilin 1 aprel tarixindən 1 oktyabr tarixinədək seçilmiş əyalət vergilərinin 6 ay müddətinə təxirə salınması ilə bizneslərə və iş yerlərinin qurucularına təxminən 9 milyard dollar dəyərində nağd vəsait təmin olunacaq. Bu da onlara işçiləri saxlamaq və iqtisadi dalğalanmalara davam gətirmək üçün yardım edəcək;
• Əmək Təhlükəsizliyi və Sığorta Şurası (WSIB) vasitəsilə, işəgötürənlərə əlavə 2 milyard dollarlıq endirim təqdim ediləcək. Bu, mart ayında paylanmış əvvəlki 2 milyard dollarla yanaşı veriləcək.

Ontario iqtisadiyyatını qorumaq üçün hökumət daxili ticarət maneələrini aradan qaldırmaq, əyalətin iqtisadiyyatını G7 ölkələri arasında ən rəqabətli hala gətirmək, inkişafla bağlı təsdiqləri sürətləndirmək və ticarət tərəfdaşlarını şaxələndirməklə bizneslərə yeni bazarlarda müştərilərlə işləmək üçün işlərini yenidən qurmaq üçün yardım göstərmək niyyətindədir.

Foto: Brucepower