Ağ Ev bildirir ki, ABŞ Prezidenti Donald Tramp tərəfindən bu gün elan edilən yeni qarşılıqlı tariflərdən Kanada və Meksika azad ediləcək.

Trampın ofisindən yayımlanan məlumata görə, Kanada, Amerika və Meksika arasında imzalanan mövcud qitə ticarət sazişi (CUSMA) çərçivəsində idxal edilən mallara tarif tətbiq olunmayacaq, lakin bu razılaşmadan kənar mallar 10 faizlik tarifə məruz qalacaq. CTV Newsun məlumatına görə, CUSMA tələblərinə uyğun olmayan mallara 25 faiz, uyğun olmayan enerji və potaşa isə 10 faiz tarif tətbiq ediləcək. Avtomobillərə 25 faiz tarifin tətbiqi isə cümə axşamı günü gecə saat 12:01-dən etibarən qüvvəyə minəcək.

The Canadian Pressin yazdığına görə, Kanada, Trampın bu gün günortadan sonra açıqladığı və əksər digər ölkələrin cümə axşamından etibarən qarşılaşacağı tarif dərəcələrini əks etdirən geniş siyahıda yer almayıb.

Tramp bildirib ki, o, ABŞ-ın idxala tətbiq etdiyi rüsumları digər ölkələrin tarif səviyyələrinə uyğunlaşdırmaqla qarşılıqlı tariflər tətbiq edəcək. Bu tariflər digər ölkələrin ABŞ idxalına qoyduğu rüsumları uyğunlaşdırmaq və onun “ədalətsiz ticarət” adlandırdığı halların qarşısını almaq məqsədi daşıyır. Xüsusilə Çin 34 faiz, Avropa İttifaqı 20 faiz və Böyük Britaniya 10 faiz tariflə üzləşəcək. Vyetnam 46 faiz, Şri-Lanka 44 faiz və Kamboca 49 faiz tariflə cəzalandırılacaq.

Baş nazir Mark Karneyin, ABŞ-la əlaqələr üzrə kabinet komitəsi ilə görüşdən əvvəl media qarşısında çıxış edəcəyi gözlənilir. O, cümə axşamı Kanadanın əyalət başçıları ilə də danışacaq.

Ontarionun baş naziri Daq Ford, çərşənbə günü Ağ Evdən gələn siqnalların müsbət olduğunu və bunun Kanadanın maraqlarını qorumaq üçün Tramp administrasiyasının rəsmiləri ilə keçirdiyi görüşlər və Amerika mediasına verdiyi müsahibələrin nəticəsi olduğunu söyləyib: “Bütün bunlar münasibətlərə əsaslanır. Həm biznesdə, həm də hökumətdə hər zaman inandığım şey münasibətlər qurmaqdır. Düşünürəm ki, biz bunu bacarmışıq”